مواعيد البلابل : الشاعر عماد المياحي
#مواعيدالبلابل
______________
ما غبت عن عيني يوم ولا خلت منك قصيدة
ولا برد شوگ لوصالك
وأني شايف خطوة جدامك بعيدة
ولا عطش مر عله بالي
وانته مايي الما شربته ولا روت روحي الوحيدة
واوف دنيه شكد عنيدة
الما حسبت حسابها ولا گلت يمكن تاخذ جدامي لدرب ما منه فيدة
بيه لهفة لحضنت عيونك مثل ليل اليتامه
بكل كتر ألمح خيالك واترك لگلبك علامة
الگف الچلمات من حلگك قصايد و انت تدري الگلمة البروحك قصيدة
واحمل حچايات منك واحترك واشرب ملامة
ويا دمع فايض
على جروف الصور تسمع كلامه
يقّسم طيوفك صور چن رجعة المفقود بين أهله وعمامه
وقسمتهن صورة صورة ودمعي فايض بانقسامه
واجمع حجاياتك المرة اسمعتهن وانتفت كل السوالف بين جنحان الحمامه
الخذت كل احلام روحي بليلة مدغوشة بحزن بين ابتسامة
وفاض بيها احساس اظلم ليل وغيوم وضباب ووحشه كلش
شما يفرگنه الوكت تاخذنه صفنه
وبيه ترجع كل سوالفنه وضحكنه
ونرسم من الماكو حضنه
وننولد فوگ الشفايف
ننسى كل طيف اليجي بليلي الطويل ينام فوك ذراع بردان ويدور بينه محنه
والبعد من ياخذ بروحك مساحة وما تغطيها الجراجف
من عبر بينه الوكت ما عصرت چفوفي اعله جفك
ما گلتلك گلبي خايف
وادري خوفي وياك يكبر والسبب هم انت خايف
أخ يا خوف الشفايف
تشتهي انفاسك تدفي الرجفة بيها وتاخذ من رسوم ضحكاتك سوالف
بيه طيفك يكبر وحدر الجفن يتوسد رموشي مثل... عصفور نازف
يا عتب منك يحز خاطر ودادي
وأنت مثل النسمة
لو هبت يناغيها الورد
ياعذب يا ماي بارد يا ترف باحساس غطوة تدفي كل خوفي واجيك بلهفة البردان يا چانون يلهب ينكسر بيك البرد
ودع سنين الزعل واتسرسح بروحي نبع فايض عذوبة
جروفي فطرها الجفا الماچانت عيونك تشوفه
وهاك كل خيوط گلبي وهاك شل جرح البروحي وايدك التعرف تروفه
واني وظروفي متاهات وجزيرة وگلبي من سافر چنت تعرف ظروفه
وادري صدرك صار تابوت بغيابي وحيل ماتت لهفتك والميت جفوفك تعيده
بيك الف عيسى الهفتي وتگدر تردلها روح وننسى كل ذاك العذاب ونفتح الصفحة الجديدة
هيچ كلشي يخضر بجفك ورد ونعيش بأحساسك مواعيد وبلابل
انته بس دنيلي واهس وانه اصيرلك نهر بين النوارس
يلي الما تدري بمعزتك گلبي الك للموت حارس
_______
#عمادالمياحي
تعليقات
إرسال تعليق