خلگ النواطير :الشاعرة ريم علاء محمد
**خلگ النواطير**
ريم علاء محمد
تذم شوفي الچنت تتمنه تلگاه ؟!
وانه العايش نظر بين التصاوير
عليك الـدار وكـتك و العلي دار
وجهك و هجرتني بدون تقصير
انه بروحي نهر يجري ويه الاحساس
يمن غم الوكت عَوزني للبير
احط بيدك نجم لو خيم الليل
و تفز وكت الفجر تتعنه للغير !
اساگيك الصبر والحب والاشواگ
وتساگيني المرار بلايه تبرير
وكت خله الاماكن غربه وياك
وانه الشايل خلگ رايدله تفسير
نطرتك و العمر خلصته شوغات
ملح لجروحي شايل بيدك تدير
تحط خلگ الركض بجدام مشلول
مسافاتك طويلة و مكرك چبير
شلتك ضوه بعيني و امنت بيك
و انه ادريك چلمة بلاية تعبير
يواگف بين رمشي و بين الدموع
بواچي وماطحت خوف التعاوير
رسمتك حلم وردي وعشته مجبور
وطشيت العمر لاجلك مناشير
شحيح الشوگ بيك وخلگك هواي
تحب تتلذذ بنزف النواعير
انه وشوگي وكياني ودمعي والشوف
صفوا كلهم على عيونك نواطير
يعايش وسط ريتي بشحة انفاس
انفاسي هوه لشهگاتك تصير
هدم حيلي الصبر وانه انطر الگاك
كلمن شاف حالي بعلتي يحير
تعليقات
إرسال تعليق