كان ياما كان : بقلم الشاعرة نداء حسين
كان ياماكان ...في قديم الزمان ...
كان في عائلة وجيران ...
و بيت واسع بالدفا مليان ..
بفصل الصيف الورد عالحيطان
وبالشتي شتي و تلج بس ماحدا بردان ...
كانت الجارة تصيح للجارة ..
والحارة كان اسمها حارة ..
من يوم شفنا ( باب هالحارة ) صارت منازلنا بلا جدران ..
أحلام فينا تشعّبت ..
و تشابكت وتضاربت ...
كل المراكب سافرت
و طير السما هربان ..
كان ياماكان ..
الخير وين ماكان ..
خوابي الزيت ملياني ..
وزوايا الدار دفياني ..
ورسمات ع أوراق الكتب ..
وأشعار مخبايي بقلب ..
البنت معروفة بنت والشب قلبو من دهب ..
كان الشتي أفكار ..
أحلام يغزلها مطر ..
حتى الجداول والحفر ..
كانت لُعَب ..كانت شغب ..
كان البرد اسمو برد
برا الجسم ..برا القلب ..
والروح معجوني بورد
و الشمس تعطينا وعد :
( رح دوّب التلجات ..ورح إمسح الغيمات ..يلا العبوا ..صار الوقت ..)
كنا قصب حول النهر ..
نحمل جفا ونحمل قهر ..
نمنع عن الأرض الغدر ..
ووقت المسا نحضن بدر ...
ونغني لطلوووع الفجر ..
كان يا ماكان .....
وصار ياماصار ....
صار الوطن غفيان..
..Neda.....
تعليقات
إرسال تعليق