حاجي غزل : بقلم الشاعر أحمد صبح
حاجي غزل
قالت
حاجي غزل دبلت غصون البان
ياشاعري .. بحر الهوى تملّا
قلب المرا مانو متل بستان
ومانو شي راهب للغزل صلّى
هموم الدني بَكّت ملوك الجان
والحزن غطى هالدني كلّا
قلوب الصبايا تعمّرت حيطان
وماعاد فيك بحرف توصلّا .
شفتي ياحلوه شَعرِك اللي بان
حتى بسوادو.. العشق متدلا
سبحان ربي لَبّسِك نيسان
كل نجمة فيكِ من البدر أحلى
كيف الحسن رح يلمحو الانسان
وتضل روح الحرف بِمحلّا
وكيف الحزن رح يخطف الوجدان
والرب نورو.. بالحلا تجلّا
رح ضل إغزل بالحرف ألوان
قلوب الصبايا بحُب تضحكلا
وخلّي الغزل فوق الرمش سلطان
وخلّي حروفي... الروح تحتلّا
...........
احمدصبح
تعليقات
إرسال تعليق