رجع المطر : بقلم الشاعر أحمد صبح
- رجع المطر-
رجع المطر
بَعَتْ الهوى مرسالْ
باعت معو شوية حكي
وغيوم عم تكشف عن الاحوال
مشتاق قلبو ياترى
او في حدا ع البال ..؟!
رجع المطر
يجمع حروف الغيم
والغَين يحبكها بياء الميم
تَ يألف الموال
جاي بخجل جاي بوجل
متردد وخايف شو رح ينقال
خايف اذا دمعو حَملْ
متردد بمعنى الجُمل
ومحتار بلكي هالقلب ما مال
معقول يلبس هالسنة أبيض
او يلبس الاسود ليستعرض
ويزنر النسمات بالخلخال..
خايف اذا تسكر بوجهو الباب
وصوت الرعد ماتسمعو الاحباب
وياخجلتِك ياريح من هالشال
زمجر ي فصل الخير اتباها
وخلي المطر فوق الزهر يختال
ولا تخاف ان هز الهوا دياتها
قلبا حنون وزهرها عسال
وان غرق قلبا بميتك نيالها
بعد الشتي .. بيفتّح الميال
.......
احمدصبح
تعليقات
إرسال تعليق