إلى فاكهة حياتي وضحكتها : محكي للشاعر منهل مالك
"إلى فاكهة حياتي وضحكتها"
اضحكي..
إذا الدمّ بيصيح
بتوب العرس
وضحكتك بفوهة بواريد
بتهمس همس
بتأدّن جراس العيد
ع طبول المعركه
أيّ يا بيي اضحكي
أيّ بابيي أضحكي
ورشّي الضحك سكر
ليكي سِتك
بلشة تتذكر..
كيف تضحك
وكيف تنشُلْ
من شال الشمس
.. خيط أصفر
تترقّع جراب الفقر
ملعون بيّو هالعمر
صرلا عمر
بجرن القلب تدّق الحزن
وتطحن حنطة الأيام
صرلّو عمر هالعمر جوعان
أي يابيي اضحكي
يا ضحكتك جبران
بلكي تنّور الليل..
بيخبز خبز أشقر
بلكي الله أكبر بيحنّ
ع لقمة مغمسه بالدم
ولك أي يابيي لاحقا ع الهم
اضحكي..اضحكي
تيعرق البرد ع خدود الجرد..
ويفتّح ورد
تيطلع بأرض الملح.. ياسمين وفل
تيّضلّ عندي سبب.. تَضَلّ
أي يابيي اضحكي
تيمّل منّي الحزن ويشتكي
ويشرب ربيع ضحكتك..
كل البكي
تعليقات
إرسال تعليق