من أيام العمر : الشاعر أحمد الخليلي
من أيام العمر
من مغرب السّلوم لطلعة نهار اسوان
كانت تدوب البنت من نظره واحده
تدوب م الخجل
دلوقتى البنت عينها حجر صوَّان
مين اللى بدَّل ف السلوك ولِعِبْ
مين اللى أورثنا التَعَب ؟
صُمنا ف حرّ الصيف لا برشمه ولا كيف
وكان كيفنا كرامة ضيف
الراديو كان كيفى ومسلسلات رمضان كانوا بحق معلمين رواد \ عبده دياب وصفيه المهندس وابله فضيله وكتير اسامى معلمة فينا رمضانَّا عامر بفرحته وخيره وفطاره مش اكتر من سحوره بس هى نعمة الراضى بقليله
فاكر فى سقيفتنا القديمة كنا ننعس بعد التراويح كان نعس هادي ومريح يجى عبد النعيم يخبط ع الصفيحة مسحراتي بعد نص الليل يصحينا كان نفسي اطلع م الغطا وافتح الباب اشوفه كنت متخيله مخلوق من سحور رمضان يجى يوم العيد يعيد علينا وكنا نفرح بيه وناكل سوا الكعك والملتوت وبابتسامة رضا يقول امس فات وبكرة يعاود يفوت وبالعيدين ناكل حلاوة وتوت
تعليقات
إرسال تعليق