انتخابات : بقلم الشاعر أ. علي أبو غدير
كتبتها قبل الانتخابات ولم يهتم لها احد او اعتبروها تجني على القوائم النبيلة ورؤسائها الاجلاء ،،،، ولكن اليوم تعيد نفسها لعل الذي اهملها سابقاً يستشعرها الان
سبيس افرشله الدرب
ياهو اليجيني وينتخب
واحلفله بالحظ والبخت
مشروعي صادگ مو چذب
والثاني يقسم بالحشد
گالالي بس لو تنتخب
للجنة اضمنلك تطب
انوب گالوا مدني
من غير ملة ولا حزب
بس غط إصبعك بالحبر
اگلبلك الدنيا گلب
لكل غرفة سبلت اشتري
ولتشيل همك للسحب
والماي يتفلتر عدل
بارد يجيلك عذب
والموطا بالحصة تجي
ونغرگك فلوس وذهب
ونزرعلك الشارع ورد
ارجوك بس النا انتخب
ومن انتخبت وخلصت
فزيت من حلم الچذب
فززني صوت المروحة
والعرگ من عندي يَصْب
والبگ اكل وجهي اكل
وفروخي تبچي بلا ذنب
وتذكرت ذاك الوعد
من گالوا انغرگك ذهب
واتاكدت من الحچي
مابي ابد غير الچذب
ما راح أشتمهم ابد
اخلاقي ما تسمح أسب
بس راح اشخبط عالسجل
واكتب علي ويا الشعب
✍🏻✍🏻✍🏻✍🏻✍🏻
علي ابو غدير
في نيسان ٢٠١٨
تعليقات
إرسال تعليق