شو يعني شعر ؟ : الشاعر منهل مالك
شو يعني شعر؟...
يعني ألم
تبري صابيعك قلم
تكتب ع الليل العدم..تاريخ بكرى
يعني ربان وفكرة... برّى الزمان
مسافرين بليل القلق بزورق من ورق
.. وتالتهم شيطان
وتا ما يهرب النسيان وتا تحلا السهرة
بيعملو سكره..
بيشيلو النقطة عن (غين) الغرق
ليصير بحر الموت بحر من العرق
وينسى الملح ع شطّ الجرح
يعني تجعلك تياب الصبح
تتعيش بين مناقير الفجر وتغريدة عطر
.. فوضى الحواس
يعني نبراس
وطريق ينداس
متل عنقود بأيلول العمر
ع نار الإحساس يقطّر خمر
يعني تطحن فكر
وتخبز شعر ع صاج الصدر
يعني تطير لبعيد ـ لبعيد... بعيد
بعد البَعد ـ خلف القمر
تتحوش صور ما لبست كلام البشر
شو يعني شعر؟؟؟
يعني تموت تتفوت جوّى مرايتك
تكتب حكايتك
وتفهم معنى الظلّ
يعني مختلّ.. أي مختلّ حافي الراس
بعكس الناس
متل القلم بتمشي عراسك
وعشوك الألم بتنزف حبر
يعني ع برزخ سطر تحفر قبر
يحضن كلام مكلوم
يعني ترجف قصب
ترعد غضب وتصيح
تشكي متل ريح
تبكي متل غيم الشتي
تسقي أمل ملحود
بلكي القبر يحكي...
وسبحان مَن يُحيي
منهل مالك
تعليقات
إرسال تعليق